ᕿᑎᕐᒥᐅᑦ ᐱᖓᖕᓇᖓᓂ ᐊᑐᖅᑐᒃᓴᑦ ᑎᒥᖁᑖ (WKR) ᑐᓂᓯᓚᐅᖅᐳᑦ ᐊᒃᑐᐃᓂᕐᒧᑦ ᑎᑎᕋᖅᓯᒪᔪᒥᒃ ᖁᕐᓗᖅᑐᐊᕐᔪᖕᒥ ᐊᖅᑯᑎᒧᑦ ᐊᒻᒪ ᑐᓚᒃᑕᕐᕕᖕᒧᑦ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓄᑦ (NIRB), ᓇᓗᓇᐃᖅᓯᓪᓗᓂ ᐱᕐᔪᐊᖑᓪᓗᓂ ᐱᓕᕆᐊᖑᔪᒥᒃ ᕿᒥᕐᕈᔭᐅᖏᓐᓇᖅᑐᒥᒃ ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᖃᑎᒌᒍᑎᒃᑯᑦ ᐊᒻᒪ ᓄᓇᕗᒻᒥ ᐱᓕᕆᐊᒧᑦ ᐸᕐᓇᐃᓂᕐᒧᑦ ᖃᐅᔨᓴᕐᓂᕐᒧᓪᓗ ᐱᖁᔭᕐᒥ. ᐋᖅᑭᒃᓱᖅᑕᐅᓯᒪᓪᓗᓂ ᒪᓕᒃᑐᖃᖅᖢᓂ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑕ ᓄᓇᓕᖕᓂ−ᑐᓴᐅᒪᑎᑕᐅᔪᓂᒃ ᒪᓕᒃᑕᐅᕙᓪᓕᐊᕙᒃᑐᓂᒃ, ᑖᓐᓇ ᐊᒃᑐᖅᓯᓂᕐᒧᑦ ᑎᑎᕋᖅᓯᒪᔪᖅ ᐃᓚᓕᐅᔾᔨᓯᒪᕗᖅ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ,  ᓄᓇᓕᖕᓂ ᖃᐅᔨᒪᓂᖅ, ᓄᓇᖃᖅᑳᖅᓯᒪᔪᑦ ᖃᐅᔨᒪᓂᖏᑦ, ᐊᒻᒪ ᐅᐊᓕᓂᕐᒥᐅᑦ ᖃᐅᔨᓴᖅᑐᓕᕆᓂᖅ 11-ᖑᓪᓗᑎᒃ ᐅᖃᓕᒫᒐᑦ ᐊᒻᒪ 5,000 ᒪᒃᐱᒐᐃᑦ ᐅᖓᑖᓃᑦᑐᑦ, ᖃᐅᔨᓴᖅᖢᑎᒃ ᐆᒪᔪᑦ ᓇᔪᒐᖃᕐᕕᖏᓐᓂᒃ ᐊᒻᒪ ᐃᓅᓯᕐᒧᑦ ᒪᑭᒪᓇᓱᐊᕐᓂᕐᒧᑦ ᐊᒃᑐᐃᔾᔪᑕᐅᓲᓂᒃ.

 ᖃᐅᔨᓴᖅᓯᓂᖅ ᐃᓱᓕᑎᑦᑎᕗᖅ ᐃᒪᓐᓇ, ᑐᒃᓯᕋᐅᑕᐅᓯᒪᔪᓄᑦ ᒥᑭᒡᓕᒋᐊᖅᑎᑦᑎᓂᕐᒧᑦ, ᐊᐅᓚᑦᑎᓂᕐᒧᑦ, ᐱᐅᓯᒋᐊᖅᑎᑦᑎᓂᕐᒧᓪᓗ ᐊᑐᖅᑕᐅᕙᒃᑐᓄᑦ, ᓇᓕᐊᑐᐃᓐᓇᖅ ᐊᒥᐊᒃᑯᒋᔭᐅᔪᖅ ᐱᓕᕆᐊᖑᔪᖅ ᑲᑎᑉᐸᓪᓕᐊᔪᓪᓘᓐᓃᑦ ᐊᒃᑐᖅᓯᓂᐅᔪᑦ ᓂᕆᐅᒋᔭᐅᕗᑦ ᐊᖏᓗᐊᔾᔮᙱᓐᓂᖏᓐᓂᒃ. ᐅᑕᖅᑭᔪᑦ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓂᒃ ᐊᖏᖅᑕᐅᒃᐸᑕ ᑭᒃᑯᑐᐃᓐᓇᓂᒃ ᕿᒥᕐᕈᓚᐅᖅᑎᓪᓗᒋᑦ, ᐱᓕᕆᐊᖅ ᐱᓕᕆᐊᒧᑦ ᓇᓗᓇᐃᒃᑯᑕᖅᑖᕋᔭᖅᑐᖅ ᓇᓗᓇᐃᖅᓯᓗᓂ ᒪᓕᒋᐊᓕᖕᓂᒃ, ᑭᖑᓂᐊᒍᑦ WKR−ᑯᑦ ᐱᓇᔪᓕᕐᓗᑎᒃ ᐊᒥᐊᒃᑯᓂᒃ ᐱᔪᓐᓇᐅᑎᓂᒃ ᐱᔭᐅᔭᕆᐊᓕᖕᓂᒃ ᓴᓇᔭᐅᓂᒃᓴᖓᓄᑦ ᐊᐅᓚᑕᐅᓂᖓᓄᓪᓗ. ᐊᑕᖏᖅᖢᒍ ᐊᒃᑐᖅᓯᓂᕐᒧᑦ ᑎᑎᕋᖅᓯᒪᔪᖅ ᑐᓐᓂᖅᑯᑕᐅᓚᐅᖅᑐᖅ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓄᑦ ᒫᑦᓯ 1−ᒥ ᐱᒋᐊᖅᖢᓂ ᒪᓂᒪᕗᖅ ᖃᕆᑕᐅᔭᒃᑯᑦ ᐱᔭᐅᔪᓐᓇᖅᖢᓂ ᐊᑦᑕᑕᕐᕕᐅᔪᓐᓇᖅᑐᓂ ᐊᑖᓃᑦᑐᓂ.